Saili i faamatalaga e iloa ai le umi e tuuina atu ai se faaaliga, o mea e moomia ona e faia, i le taimi e faagata ai lau mautotogi i se fale e board ai.
Tuuina atu e le tagata nofo mautotogi o se faaaliga
E mafai e le tagata nofo mautotogi ona faagata le mautotogi i le tuuina atu o se faaaliga e lē itiiti ifo ma le 48 itula. E ui i le mafai ona tuuina atu le faaaliga lenei e aunoa ma se faamaumauga tusia, e lelei mo tagata nofo mautotogi le faia o se faaaliga tusia ma taofi se kopi mo i latou lava.
Tuuina atu e tagata e ona le fale o se faaaliga
E masani i le tagata e ona le fale e board ai ona tuuina atu le 28 aso o se faaaliga tusia. E iai tulaga e tuusaunoa mai le faiga lea.
E mafai e le tagata e ona le fale e board ai ona vave faagata se mautotogi pe afai na fai e le tagata mautotogi tulaga nei:
- na mafua ai, pe na faamata‘u o le a ia faaleagaina, matautia le faaleagaina o le fale e board ai
- faaleaga, pe faufau e faaoo le leaga i tagata po o meatotino
- faatupu, pe faufau e faatupu, se faalavelave matautia i isi tagata mautotogi.
E mafai e le tagata e ona le fale ona tuuina atu se faaaliga tusia e faamuta ai se mautotogi i le isi 48 itula o sosoo ai pe afai:
- e lei totogia tupe o le fale ua tuai ona totogi e le tagata nofo mautotogi i totonu o le 10 aso o ta‘ua i le faaaliga tusia
- o lo o faaaogāina e le tagata nofo mautotogi le fale e board ai mo gaioiga e faasā i le tulafono
- o iai tupe o le fale ua tuai ona totogi ma e manatu lē ona le fale o lo o faainaelo le tagata mautotogi i le potu, (ina ua uma ona faia se asiasiga i le potu, ma afai e mafai, sa fesootai atu i le tagata o lo o feagai ma le tagata mautotogi (pe afai) o faailoa i latou nei i le maliega nofo mautotogi).
Afai e faainaelo le tagata nofo mautotogi i le fale e board ai
O tulaga nei e tatau ona faia ai se faaaliga:
- ia tusia
- aofia ai le aso na tuuina atu ai le faaaliga
- aofia ai le aso o le a faamuta ai le nofo mautotogi
- aofia ai le mafuaaga mo le faamutaina o le mautotogi (se‘i vagana na tuuina atu le 28 aso i se faaaliga, ma e afai o lea e lē moomia se mafuaaga)
- aofia ai le igoa o le tagata nofo mautotogi
- aofia ai le igoa, tuatusi tau fesootaiga ma numera o le telefoni a le tagata e ona le fale po o le sui.
Faaaliga taui ma sui
E lē tusa ai ma le tulafono mo se tagata e ona le fale nofo mautotogi ona tuuina atu se faaaliga e taui ma sui ai. O se ‘faaaliga taui ma sui’ o se tulaga ua tuuina atu ai e le tagata e ona le fale se faaaliga i le tagata nofo mautotogi e faamuta se nofo mautotogi e taui ma sui ai i se tagata nofo mautotogi o lo o faaaogā lana aiatatau. Mo se faataitaiga, pe afai ua faia e le tagata nofo mautotogi se faaseā e uiga i le nofo mautotogi.
Afai e tuuina atu e le tagata e ona le fale nofo mautotogi se faaaliga taui ma sui, e mafai e le tagata nofo mautotogi ona faatalosaga atu i le Tenancy Tribunal e teena le faaaliga. E tatau i le tagata nofo mautotogi ona faia se talosaga i totonu o aso faigaluega e 28 talu ona ia tauaaoina le faaaliga.
O mea e tatau i le tagata nofo mautotogi ona faia i le uma ai o lana mautotogi
I le uma ai o se mautotogi, e tatau i le tagata nofo mautotogi ona:
- tuua le fale e board ai
- aveese uma ana meatotino
- taatia le potu na ia faaaogāina i se tulaga mamā ma aulelei, ma aveese uma lapisi
- toe faafoi ni ki, pass cards ma isi mea sa malupuipuia ai le fale i le tagata e ona le fale
- taatia mea uma (e pei o meafale) na saunia e le tagata e ona le fale mo tagata nofo mautotogi e faaaogā.
Toe faafoi atu tupe faamau
A faamuta se nofo mautotogi, e tatau i le tagata nofo mautotogi ma le tagata e ona le fale mautotogi ona faia faatasi se asiasiga o le fale.
O tagata mautotogi o teu lelei le fale o nonofo ai, totogi le tau atoa o le potu, ma totogi mea o nofo aitalafu ai e tatau ona toe maua le tupe faamau i le uma ai o le mautotogi.
Afai na tuuina atu le tupe faamau i le Tenancy Services, faatumu faamatalaga o le pepa e toe totogi ai tupe faamau ma lafo i le Tenancy Services e faagaioia ai.
O nofo mautotogi mo fale e board ai, e lē moomia ona tuuina atu le tupe faamau i le Tenancy Services pe afai e tasi le vaiaso o le tupe faamau pe itiiti ifo, ma e tatau i le tagata e ona le fale ona toe totogi le tupe faamau mo maliega nofo mautotogi taitasi.
Afai e faainaelo le tagata nofo mautotogi i le fale e board ai
Afai e iai se tupe o le fale na tuai ona totogi e le tagata nofo mautotogi, ma e talitonu le tagata e ona le fale ua faainaelo le tagata lea i le fale e board ai, ona faia lea e le tagata e ona le fale o tulaga nei:
- e mafai ona ia faapipii i le faitotoa o le potu a le tagata nofo mautotogi se faaaliga. O lo o fautuaina i le faaaliga le tagata nofo mautotogi o le a ulufale le tagata e ona le fale nofo mautotogi i le potu i le 24 itula e faamaonia pe faamata ua tuua pe leai foi e le tagata nofo mautotogi le potu
- tatau ona faia taumafaiga talafeagai uma e faafesootai ai le tagata (pe afai) o faailoa i le maliega nofo mautotogi.
E lē tatau i le tagata e ona le fale nofo mautotogi ona ulufale i totonu o le potu seia savalia le 24 itula o le faaaliga na faapipii i le faitotoa.
O le taimi lava ua uma ai ona faia le asiasiga a le tagata e ona le fale mautotogi i le potu, ma ua faamaonia mafuaaga, o le faainaelo ai i le nofo mautotogi, e tatau ona ia tuuina atu i le tagata nofo mautotogi le isi 48 itula e faamuta ai le nofo mautotogi. E tatau ona faapipii le faaaliga i le faitotoa o le potu ma e aofia ai le taimi ma le aso o le a faamuta ai le nofo mautotogi.
Afai ua maliu se tagata nofo mautotogi
E faamuta le nofo mautotogi i se fale e board ai pe a mavae le 48 itula talu ona maliu se tagata nofo mautotogi na o ia lava o ta‘ua i le mautotogi.