Whare Hou: E hoa, kei te wātea mai koe mō te wā poto?
Whare Tawhito: Te āhua nei, ka roa tō poto. Heoi, karawhiua...
Whare Hou: He aha te rēti?
Whare Tawhito: Ko te rēti he moni ka hoatu e ngā kainoho whare ki te tangata nōna te whare i ia wiki, i ia rua wiki rānei. He utu tēnei mō te noho ki tētahi whare, pēnei i a koe nā.
Whare Hou: Koia, koia. Te pai hoki. Ā, he aha te moni here?
Whare Tawhito: Ka taea e te tangata nōna te whare te tono tētahi moni here i ngā kainoho i mua i te noho mai, tae atu ki te whā wiki o te utu rēti. Ka tukuna te moni here nei ki te Ratonga Noho Whare māna e pupuri. He here tēnei me kore e tūpono ka hē te whare, ka kore rānei e utua te rēti.
Whare Hou: Ko wai ka utu i ngā nama kia kore e whakakī noa i te pouaka mēra me te mākū haere noa?
Whare Tawhito: Ka utu ngā kainoho i ngā nama mō ngā mea ka whakamahi nei rātau; te hiko, te ipurangi me ētahi atu. Mā te tangata nōna te whare e utu ngā nama e hāngai ana ki te whare tonu, pēnei i ngā reiti.
Whare Hou: Ka pēhea te nakahi kākāriki rā kei te pātiti?
Whare Tawhito: Ko te ngongo wai tērā.
Whare Hou: Wiiii! Kua mau mai ki a au. Tangohia atu, tangohia atu!
Whare Tawhito: Mō ngā kainoho, utua tō rēti i te wā e rite ana, ia wiki, ia rua wiki rānei. Mehemea kei te utu ā-wiki koe, me kotahi wiki te utu tōmua. Mō te rēti rua wiki, me rua wiki te utu tōmua. Me kōrero tahi ngā kainoho me ngā tāngata whai whare mehemea ka hua he raruraru. Me tuku e ngā tāngata whai whare te moni here ki Ngā Ratonga Noho Whare i roto i te 23 rā mahi, mā te ipurangi rānei ki tenancy.govt.nz. He māmā. Ka utu ngā kainoho i te hiko, i te waea, i te ipurangi, i te haurehu me ngā mea ka whakamahia e rātau. Ka utu ngā tāngata whai whare i te inihua mō te whare me ngā reiti. He pārongo anō ki tenancy.govt.nz.
Close transcript
