Faailo asu i falemautotogi
O falemautotogi uma e faamalosia le tatau ona iai ni faailo asu poo faailo o loo ola lelei. O faailo asu fou e tatau ona mafai ona vave iloa se afi a'o lei oo ina matuā sasao (photoelectric) ma ia umi le taimi e ola ai le maa, poo le ola i uaea eletise.
O faailo asu e tatau ona faapipii:
- i totonu o le 3 mita mai le faitotoa o le potumoe, poo potu uma o loo faaaogā e momoe ai
- i fogafale taitasi o le fale pe afai e tele ona fogafale
- i ituaiga falemautotogi uma, o kalaveni mautotogi, ma sleep-outs.
O faailo asu uma lava e tatau ona:
- mafai ona vave iloa se afi a'o lei oo ina matuā sasao
- oo atu i le valu tausaga le aogā o le maa, poo le faaaogā o uaea eletise
- mulimuli lelei i faatonuga mai le kamupani e gaosia faailo asu
- ausia taiala faavaomalo.
E lē manaomia fua ona toe sui faailo asu o loo iai i le taimi nei pe afai o lena e ola, ma e lei tea le aso e uma ai le aogā.
O le matafaioi a tagata e ona fale ma tagata o loo nonofo i falemautotogi le tausia lelei o faailo asu
E tatau i tagata e ona fale ona faamautinoa o faailo asu:
- o loo ola i le uluai taimi na amata mai ai se mautotogi fou
- o loo tumau lava ona ola i le taimi o loo mautotogi ai tagata
E tatau i tagata o loo nofo mautotogi:
- ona aua le faaleagaina, aveesea, pe tapē se faailo asu
- ona sui maa o faailo asu pe a pepē i le taimi o loo mautotogi ai i le fale, pe afai o ituaiga tuai o maa lea e mafai ona sui
- ona vave faailoa i le tagata e ona le fale pe a iai ni faafitauli i faailo asu.
E mafai e tagata e ona fale ona asia a latou fale mautotogi ina ia faatino mea e manaomia mo faailo asu. E tatau ona 24 itula talu ona avatu sa latou faaaliga ma o le va o le 8am ma le 7pm e mafai ai ona latou asia falemautotogi.
Afai e lē faatinoina e tagata e ona fale a latou tiute, e mafai ona oo atu i le $4,000 la latou salatupe. Afai e lē faatinoina e tagata o loo nonofo mautotogi a latou matafaioi, e mafai ona oo atu i le $3,000 la latou salatupe.
Falemautotogi mo tagata eseese
E tatau i tagata e ona fale ona sui maa ua pepē i le vaega o falemautotogi o loo faaaogā uma e tagata eseese (boarding houses), e pei o auala savali i le va o potu ma umukuka.
E tatau i tagata o loo nonofo mautotogi ona sui maa ua pepē o faailo asu o loo faapipii i totonu o a latou potumoe.
Afai e iai ni faafitauli i faailo asu
Afai o loo e popole i faailo asu o lou falemautotogi, talanoa i le tagata e ona lou fale poo le tagata o loo mautotogi ina ia foia le faafitauli.
Afai e lē maua se tou maliega, e mafai ona e talosaga e fai se tou faatofāla'iga (mediation) pe talosaga ina ia fofogaina lau mataupu i luma o le Tenancy Tribunal.
